vidéos musique Centrafricaine

Loading...

26/04/2010

Elections



MBELA


Akoli, awali na amoléngué ti Bêafrica
Aita ti mbi.
Na ngou 2010, é yéké gwé ti soro fini gbia ti kodro ti é, Bêafrica, na afini wa bada alézo ti é. Fadé ala ké sara kwa na ya ti ngou okou tongana makondji na awa bada alézo ti kodro ti é.
Mandako so a yéké douti na ya ti tangö ti ngangou ngbanga, ti a bira na akpalé ndé-ndé so kodro ti é a wara na ya ti a ngou so a hon. A zo ti Béndö ti guigui a mou mamboko na é mingui ti siguigui na ya ti akpalé so, a tà so aténé na abira ni a dé ti oundji apé.
Mandakö so a yéké si na tangö so kodro ti é a wara ngou balé okou ti dipenda. Na ya ti kodro ti Africa so a kpéngba, kodro ti é a yéké na passa mingui. Tènè ti gnè? Ndali ti so, biri, siriri ayéké na ya ti kodro ti é. A zo a iri Bêafrica, kodro ti siriri na ti yamba ngo zo nzoni, séssé ti zo kwé zo, ti zo a yéké na ti zo so zo la. Tènè so kwé a gbou la ni bè ti kozo gbia ti kodro ti é, Barthélémy Boganda mingui. Lo tiri manga ni si lo wara kwa ti ngangou. Kota passa ti é a yéké yanga oko, sango, so é kwé é yéké tènè ni. Na bagué, Nzapa a mou na é mossoro mingui so a éré àwandé mingui na popo ti é. So nzoni yé ! gnè la si é sara na yé so kwé ?
Yé oko apé. A ké tongasso la é ga bouba, gnama ti nguia na lé ti dounia mobimba, awa yèré.
Léngo-gbia abouba yé mingui si mabé ti amoléngué ti kodro ti yé a ti. Voundou a sara ala tènè ti so ngourou-gbia na bada alézo ti é ati na ya ti kwa ti ala, si séssé ti siriri aga mbéni yé ndé. A zo mingui aké ti yé da na tènè ti ngourou-gbia na bada alézo so kwa ti ala agoué yémbélé-yémbélé.
Mandakö ti léngo-gbia na ti ngango wa bada alézo ti ngou 2010 ayéké fini passa so amou légué na é ti gbou fini ti é na ya mamboko ti é, ti kpéngba téré ti é, nga na ti siguigui na kodro ti é na ya ti passi ti mossoro. E ba passi alingbi awé. Engo é na nguia alingbi awé. Kaméné so agbo é na ya ngou balé okou so alingbi awé.
Yé ni gnè ?
E lingbi ti yo li ti é na ndouzou apé ?
Azo ti vènè na awa andà abouba é alingbi awé.
E yé ti pika katé ti é ngà na ndö kodro ti é tongana amba ti é.
E yé ti siguigui na ya ti bira so a ké fouti ndjoni douti na popo ti é
E yé ti siguigui na ta passi ti mossoro.
E yé ti ba ndjoni.
Akoli na awali ti bêafrica
A ita ti mbi.
A la fà légué mingui kodè na ndara so ala yéké nani ti soro agbia ti kodro na awa bada alézo na ya siriri, a tà so a kama-porosso ndé-ndé ayéké dà.
Mbi ba ala na tango so passi ayéké na ya ti kodro ti é. Mbi ba ngangou so ala sara ti ngba na fini, ti gui kobé ti yanga ti ala, ti bata tèrè ti ala na a séwa ti ala. So ayéké péndéré mingui! Mbi ba ala na ya ti déma, na ya ti bira ndé-ndé, na ya ti akî na kpalakongo. Mbi ba kodè ti ala ti siguigui na ya ti asioni yé. A la yéké na ngangou mingui ti kindà passi, toto na déma. Békou ti ala ayéké kota.
Na ngangou so é yéké na ni, gnè alingbi ti kanga é na ya ti sopo ? Mabé ti é a so é.
Mbi yé ti lékéré kodro ti é na ya ti siriri. Mbi yé ti mou mamboko ti mbi, ndara ti mbi na bêkou ti mbi kwé ti maï na Bêafrica, kodro ti é, péndéré kodro so Nzapa a mou na é. Ti tènè gbou ngo li ti mbi aga tà tènè, mbi yé dà ti li na ya ti mandako ti léngo-gbia na Bêafrica na ti ngango bada alézo. Ndali ni la mbi ounda na ala kwé ti mou na mbi mamboko mingui.
Siriri na sé tèrè adouti na bè ti é kwé.

Singuila mingui.

Moléngué na ita ti ala



Aucun commentaire:

Enregistrer un commentaire